موضوع هيغيير حياتنا بشكل كبير......

السلام عليكم
التوافق هو خلق جو من الالفه و الاطمئنان مع الشخص الى انا بكلمه بطريقة مقصودة لغرض شريف او غير شريف (بهزر طبعا) اقصد زي انى اقنع الطرف الاخر بشئ او صفقة (زي ما بتوع المبيعات بيقولوا) او اني اخليه يعمل حاجة انا عاوزها (قيادة يعنى).
طيب مش قبل اما اشرح طرق التوافق لازم اعرف بيجي ازاي؟؟؟
تمام, زي ما احنا عارفين ان الإنسان بيتكون من عقل واعي و عقل لاواعي
وجدوا ان العقل الواعي بيستقبل في الثانيه حاجة اسمها 7+2-2 اشارة
يعنى الانسان الطبيعي بيستقبل 7 اشارات في الثانيه و الذكي بيستقبل يا اما 8 او 9 (+2)
و اللامؤاخذة الغبي بيستقبل يا اما 6 او 5 (-2)
بس اكتشفوا بردو ان العقل اللاواعي بيستقبل 2 مليار اشارة في الثانيه !!!!!!!!!!
طيب العقل الواعي بيستقبل الاشارات دي عن طريق ايه؟؟؟
الاجابة : حواسنا الخمسة و قسموها الى 3 اقسام (البصر - السمع - الشم,التذوق,الإحساس)
بس فيه ناس بتحب انها تستقبل الاشارات دي او المعلومات الخارجيه عن طريق البصر و سموهم الناس البصريين
و فيه ناس بتحب تستقبل المعلومة او تطلعها عم طريق السمع و سموها سمعيين (تطلع المعلومه يعني مش هتتكلم من ودنها بس تكون المعلومة تميل الي السمع اكتر يعنى بهدوء و صوت واطي)
و فيه ناس بتحب انها تستقبل و تطلع المعلومة عن طريق مشاعرها و احاسيسها و سموهم ناس حسيين
و لكل تصنيف من دول خواصه المعينه التى سيتم شرحها باذن الله
و سموا التصنيف ده حاجة اسمها (انماط تمثيلية)
و احنا فينا الانماط الثلاثه لكن مش في اي وقت و فيه نمط او 2 بيغلبوا علينا في التعامل العادي

طيب العقل اللاواعي بيستقبل الاشارات بتاعته منين
الاجابة : من الحواس الخمسة بردو (هو فيه غيرهم) او ممكن نقول ال 6 لما نضيف عليهم حاجة اسمها التخاطر (او مش لازم نضيف خليهم 5 احسن عشان المشاكل)

أضافة صغيرة قبل ما اكمل
ان المخ مقسم الى جزئين (فص يمين مسؤل عن التخيل و شمال مسؤل عن التذكر و العمليات المنطقية) بس ممكن يتعكسوا عند الشخص الايسر (الى بيكت بأيدة الشمال)

طيب اعرف منين ان الشخص ده بصري و لا سمعي و لا حسي
نمسك الشخص البصري و صفاته
بيتكلم بسرعة, مقاطع في الكلام, صوتة عالى, بيحب يبقى قائد, المعلومات بتجيله عن طريق صور,
انيق جدا في ملابسة, يحب الالوان, يحب الخلاصة في اي موضوع, متسرع في اتخاذ القرارات, مادي و واقعي التفكير, خيالي (بس خياله مادي يعنى ممكن يحلم انه يعمل شركة ناجحة و يحلم بده بس مش ممكن يحلم انه قاعد في جزيرة بعيدة مع حبيبته وسط المياه), بيتنفس بسرعة, بيستخدم كلمات داله على الصور زي (بص يا ابني ده - شوف بقى لما اقولك - ده الراجل منظرة - الموضوع شكله باظ), ممكن عنيد شوية
طيب لما الشخص البصري بيفتكر حاجة عينه بتروح ناحية الفص المسؤل عن التذكر الى هو الشمال و الى اعلي يعنى عينه بتروح شمال فوق
و لو بيتخيل حاجة عينه هتروح يمين فوق
يعنى لو سألته اسم جدك الخامس ايه (لو كان عارفه الله يرحمة) هتلاقي عينه راحت لشمال فوق
و لو قلتله هي السلحفة الى بتطير شكلها ايه هتلاقي عينه راحت يمين فوق
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــ

نفتكر مع بعض ان فيه عقل واعي و لا واعي
و ان فيه فصين في المخ (يمين مسؤل عن التخيل و شمال مسؤل عن التذكر)
و ان العقل الواعي بيستقبل من 5 الى 9 اشارات في الثانية و اللاواعي 2 مليار إشارة في الثانية
و الانماط التمثيليه 3 (بصري سمعي و حسي)

نتكلم عن النمط السمعي و صفاتة :
النمط السمعي بيحب يستقبل المعلومة عن طريق السمع و التحليل المنطقي للأمور, يحب التفاصيل زي عنيه, هاااااااااادي الى درجة تشل, مفكر ممتاز و جيد, ذكي جدا عادة, بيتنفس ببطء, بيتكلم بهدوء و بطء, لو تكلمه في موضوع يفضل ساكت و يسمعلك (لدرجة انك تحس انه مش مركز او مات او جراله حاجة), ميعرفش ياخد قرارات سريعة و لازم تسيبه يفكر, لو اجبرته انه يرد بسرعة ممكن ياخد قرار غلط (و هيكرهك جدا), مادي التفكير (مش خيالي يعنى), بيحب يستخدم كلمات داله على السمع زى (سمعت النهاردة عن.... - نبرة صوتك مش مريحاني في الكلام - الموضوع ده كدا ليه رنة) مابيحركش ايده في الكلام كتير (البصري تلاقيه بيرقص و هو بيكلمك) عادة كبار رجال الاعمال و الناس المهمة بيكونوا سمعيين
لو الشخص السمعي بيتخيل حاجة عنيه بتروح لليمين على المستوى الافقى (ناحيه ودنه يعني زي ما كانوا بيقولولنا)
و لو بيفتكر حاجة هتروح ناحية الشمال على المستوى الافقي

طيب مدير الشركة لازم يكون بصري ولا سمعي ؟؟؟؟؟
الاجابة ان لو المدير سمعي هتكون قراراته صائبة غالبا و تحليليه منطقيه ولكن عقبال ما يطلع القرار يكونوا الى في الشركة اتشلوا
و لو بصري يبقى القرار يكون بسرعة و صائب بس مش كامل فيه عيوب
فالاحسن ان يكون المدير سمعي و تحتيه بصري
او يكون صاحب نمط مركب (سمعي بصري)

طيب الشخص الحسي و صفاتة

دي الشخصية الى نعرفها كلنا و الي نقولها يلا نروح سينما يقول ماشي
يلا نروح نصلي ..... ماشي
يلا نروح شارع الهرم........ماشي
زي ما راح زي ما جه (نسمة ماتحسش بيه)
الشخص ده بياخد قرار على حسب مشاعره بيتقوله ايه (حابب و لا لا)
لو الشخص ده حب حد بيحب بكل مشاعرة و لو كره حد بيكرهه جدا و بيكون هدفة الوحيد فيه الحياة هو اذيته
هادي جدا جدا جدا لحد بكرة متردد ما ينفعش ياخد قرار صحيح (عادة) في شركة مثلا, مدير فاشل
بس موظف ممتاز ( يعني تقوله انت وظيفتك كذا و حدودك كذا و تلاقيه لهلوبه بيخلص)
خيالي التفكير الى ابعد الحدود و عايش فوق السحاب و الكلمات الى بيحب يستخدمها هي (انا حاسس ان الموضوع حلو - الموضوع ريحته فاحت - حسيت كدا ان اللون ده دافي)
لما بيتخيل عنيه بتروح يمين تحت (ناحية قلبه يعني)
ولما بيفتكر عنيه بتروح شمال تحت و نادرا لما يحرك ايده في الكلام

طيب النقطه المهمة .... العقل الواعي بيستقبل 7 (+او-)2 اشارة
و اللاواعي بيستقبل 2 مليار إشارة (يا عم انت قلت الكلام ده بتاع خمسين مرة لحد الوقتي .. لخص بقى) احم طيب

لو عاوز اوصل اشارات اكتر لحد اوصلها له عن طريق ابو 7 ولا ابو 2 مليار
ابو 2 مليار طبعا الى هو العقل اللاواعي
طيب العقل اللاواعي بيستقبل ايه؟؟؟ و بياخد باله من ايه؟؟؟
عادة العقل اللاواعي بياخد باله من كل حاجة حواليك حتى لو انت مش مركز عليها و بتخش الذاكرة و انت مبتحسش بيها (دول 2 مليار يا عم الحج)
الى يهمنا هنا ان العقل اللاواعي بياخد باله من 4 حاجات في الشخص الى بيتكلم قصادة
1. الكلمات الي بيقولها
2.نبرة الصوت و طريقة الكلام
3.حركات و تعبيرات الجسد
4.حركات و تعبيرات الوحه

و هنستفاد ايه من ده كله
ان الاشارات دي لو متوافقة معاك و على مزاجك (اقصد مزاج عقلك اللاواعي) هتحس بالراحة مع الشخص الى بتكلمه و لو مش متوافقه هتحس ان فيه حاجة غلط
عشان كده احنا لما بنشوف انسان من اول مرة بنحس ان احنا مستريحنله
و ده على حسب هو قريب مننا ولا لا و بيستخدم كلمات زيينا ولا لا و بيتحرك زيينا ولا لا و نبرة صوتة و هدوءه زيينا ولا لا (يعنى من الاخر نمطه التمثيلي زيينا ولا لا)

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــ

نكمل موضوعنا ان شاء الله بس نفتكر
ان فيه سمعي و بصري و حسي و دول اسمهم انماط تمثيلية
و ان كل واحد من دول ليه طريقته في الكلام و الكلمات الى بيحبها و طريقة تفكير معينة و حركات معينة
طيب انا لو عاوز اقنع محمد مثلا انه يسافر معايا اسكندرية نقضي كام يوم
و حمادة ده من النوع البصري اقنعة ازاي؟؟؟؟؟
اكيد لازم اتكلم اللغة بتاعته الى بيفهمها و يحبها
فأقول له
( بص يا ابنى المنظر هناك تحفة, هشوف بجد حاجة تانية هناك, تخيل معايا كده و انت بتتفرج على منظر البحر حاجة تانية و بعدين مش هتدفع كتير و الى بتصرفة هنا هو الى هتصرفة هناك و يمكن اقل هه رايك ايه بسرعة) و تكلمه بنبرة سريعة نسبيا و تحرك ايدك و انت بتوصفلة(زي ما هو بيعمل)
بس متجيش تقولة ان انت هتحس بالراحة هناك و الجو شاعري و احساس البحر فوق هدير الموج على شط الندي و الكلام الحمصي ده (يعني ايه شط الندى صحيح مش عارف)!!!!!

طيب لو محمد ده سمعي اقنعة ازاي
اتكلم معاه بهدوء و براحة اقولة "يا محمد اسمعني في اسكندرية الجو هادي و جميل و بعدين ده كفايه يا جدع صوت البحر هناك ده بالدنيا و احنا هنقعد بتاع 7 ايام هنمشي الخميس الساعة 6 الصبح و نكون هناك على الساعة 10 10ونص كده و هنعمل ............. (ارغي فى التفاصيل) و هنروح البيت على الساعة 5 الخميس الى بعدة و بعدين الايجار فى الاسبوع 250 جنيه و احنا 5 يعنى انت هتدفع 50 و الشقة دى بيقول عليها مدحت انها تحفة و انو اتبسط جدا هناك الشهر الى فات(نسيت اقول ان الشخص السمعي بيحب الحاجات الى اتجربت قبل كده عشان الثقة يعنى) و اسمع بقى فكر براحتك و رد عليا على بكرة ماشي"

اما الشخص الحسي ف هقول له
"يا محمد ياه على مقدار الراحة الى انت هتحسها هناك متتخيلش معايا الاحساس هناك رومانسي قد ايه قاعد كده مع نفسك على البحر و الموج تحت رجلك و ريحة البحر الحلوة و انت محتاج يا اخي انك تريح شوية بجد و الله يلا يلا قوم هات هدومك و احنا مستنينك تحت في العربية انت اخدتله القرار بداله"

طيب هل الموضوع ده بينفع يعنى؟؟؟؟؟؟
اه بينفع عشان انت بتكلم الشخص باللغة و الطريقة الى بيحبها و لو معملتش ده هيحس بعدم الراحة فى الكلام عشان اكن هو بيكلمك عربي و انت بتكلمه روسي فمش هيحصل توافق او راحة
عشان كده ممكن تلاقي شلة من الناس بس فيهم واحد الكل مجتمع على انه غتت او انهم مش مرتحينله
و هو انسان كويس جدا بس السر انه مش متوافق معاهم يعنى هو من نمط و هما كلهم من نمط تاني
فبيحسوا بعدم الراحة معاه عشان
عقلهم اللاواعي استقبل اشارات كتيرة منه انه مش متوافق
فالاشارات دي اترجمت على انها مشاعر عدم راحة
علشان كده انا لو عايز اتوافق مع كل الناس لازم اتعلم ازاي ابقى سمعي و بصري و حسي في الوقت الى انا عاوزه...

محمد محسن
محاضر تنمية ذاتية .....

شكرآ

» قالب اضافة موضوع المطور بشكل ثاني تعريب x444x team
» العطس امر مهم في حياتنا
» أخطر 12 دقيقه ف حياتنا
» اصعب 12 دقيقه فى حياتنا‎
» ~ْ.... ~ْ.... دموع القهر في حياتنا ~ْ....~ْ....~ْ....