حوار فلسطيني

حوار بين شخصين استخدما الأمثال الفلسطينية في حوارهم ولكي تستمتعوا بالموضوع حاولوا أن تقرأوه باللهجة الفلسطينية:




ابو فلسطين :الي مكتوب على الجبين بتشوفه العين ياخوي

ابو سعود : دخلك يا ابو فلسطين ايش آخر الأخبار؟

ابو فلسطين: شو بتتوقع يعني.. "إتبدلت غزلانها بقرود".

ابو سعود: ما فهمتك ؟

ابو فلسطين: يعني بصراحة أعطوهم الثقة وهم ما بستحقوها خاصة هذا اللي "أجا ونام عنا ليلة وساوى حاله من العيلة"!!

ابو سعود: مش هيك الحكي يا ابو فلسطين والزلمة لسه "ما بنعرف خيره من شره".

ابو فلسطين: أي والله لو"حبسوه مع ابليس في كيس بطلع ابليس يستغيث" هذا "زي البرد سبب كل علة".

ابو سعود: لـه يا زلمة "الحيطان الها ودان" "احنا بنمشي الحيط الحيط وبنقول يا رب السترة".

ابو فلسطين: ولليش الخوف؟ أي والله "الساكت عن الحق زي الناطق في الباطل". بعدين ايش اللي بدو يصير؟ "ما بصير اكثر من اللي صار" ، والمثل بيقول "النعجة المذبوحة ما بوجعهاش السلخ"..

ابو سعود: يازلمة "مش كل اللي بنعرف بنقال".

ابو فلسطين: بصراحة يا ابو سعود "اللي بعمل حاله نخالة تنقه الجاج" واللي قاعد بصير ما بينسكت عليه..

ابو سعود: شوف يا ابو فلسطين الحكاية اكبر من صاحبك. هاذي يا عمي أمريكا و"حدا بقدر يقول للغولة عينك حمرا"؟

ابو فلسطين: وإيش يعني أمريكا ما دام المسألة بتخص هالأرض .. لأنو يا أبو سعود "اللي بفرط بأرضه بفرط بعرضه" مش قالوا "الأرض عرض"؟

ابو سعود: معلش لكن احنا "مش قدها" و"ليش نعمل حالنا ابو علي".

ابو فلسطين: يا حبيبي "التعوير في الوش.. ما فيهوش معلش".

ابو سعود: والله إيش بدي اقول "طاسة وضايعة".

ابو فلسطين: أبداً الطاسة مش ضايعة و"خيرنا ما بصير يروح لغيرنا" وهذا مش خيرنا وبس هاذي أرضنا بتضيع ودمنا اللي بيسيل.

ابو سعود: لكن الصحيح احنا لازم نرضى باللي قاعدين برتبوه إلنا حتى لو ضاع إشي من حقوقنا لأنه "نص العمى ولا العمى كله" وزي ما بقول المثل :"بلا أهون من بلا والكساح أهون من العمى ".

ابو فلسطين: شوف يا ابو سعود "لا تدير قفاك للدبابير وتقول منايا وتقادير".

ابو سعود: والله يا بو فلسطين أنا معك لكن بعد اللي صار في العراق شكله "الدور علينا" و"الحبل على الجرار" والمثل بيقول "طيع لا تضيع" و "خليك على مقرودك ليجيك أقرد منه".

ابو فلسطين: والله إذا بدك تطاوع الأمريكان راح تنذل وتنهان والمثل برضه بقول "إلحق الغراب بدلك على الخراب" و"هاذي أمريكا وهاذي بلاويها".

ابو سعود: يا عمي "اللي ما إنت طوله لا تطاوله" و "هذا الحكي ما بجيب خبز" لكن أمريكا يمكن تجيب النا شوية خبز!

ابو فلسطين: والله "عشم ابليس في الجنة" ويا "طالب الدبس من ذيل النمس" و "إذا كنت نسيت باذكرك" وعلى رأيهم "إذا كنت نسيت اللي جرى هات الدفاتر تتقرا" وإنت نفسك شفت شو عملوا في العراق و"اللي بياكل رغيف الظالم بحارب بسيفه" بتقبل تكون هيك يا بو فراس؟

ابو سعود: أنا ما بقول نتخلى عن حقنا لكن "بالتي هي أحسن".

ابو فلسطين: يا بوسعود إحنا اصحاب حق و"الطلب الهين بيضيع الحق البين" و"الحق اللي وراه مطالب ما بيموتش".

ابو سعود: بس خلينا نجرب "لعل وعسى"، بعدين "زمان أول تحول"ويمكن انو أمريكا تغير من سياساتها لصالحنا هالمرة.

ابو فلسطين: والله يا ابو سعود "اللي أصله ........لازم ينبح" و "وين ما بقعد بنجس" و"اللي فيه طبع ما بغيره" وبصراحة انت باين الخوف قاتلك والخوف زي ما بقولوا "قطاع الركب".

ابو سعود: وانت لارضيت بمدريد ولا بأوسلو وإجا اللي أسخم منهم وهذي خريطة الطريق ومش عاجباك صراحة "انت مابعجبك العجب ولا الصيام في رجب".

ابو فلسطين: أنا والله بانصحك لكن الظاهر انو "اللي بينصحك زي اللي بيرصعك".

ابو سعود: على العموم " اللي بيجري على الناس بيجري علينا" والمثل بقول "حط راسك بين هالروس وقول يا قطاع الروس".

ابو فلسطين : كل اللي بدي أقوله "داوي جرحك مليح لا بيدمي ولا بقيح" واحنا دوانا بها الجهاد المبارك والمقاومة بكل شارع وطريق مش بالجبن والخوف والجري ورا خرابيط الطريق !!

والله هاد هو الواقع شكراً على الحوار الرائع

:دائما مواضيعك